"...daanin na lang sa lotion."

Ika-10 ng Hulyo, 2014

Huwebes, 8:48 ng gabi

            “Almusal?”… pag-uuyam ng nanay ko sa binili kong tapsilog ngayong gabi hahaha. Nawala sa isip ko na “ispageti” nga pala ang iluluto niya; ang natandaan ko lang sa sinabi niya kaninang umaga ay hindi siya magluluto ngayong gabi ng ulam at kanin… sana pala “pidza” na lang inuwi ko. Ang ending, hindi ako nakakain ng luto niyang “ispag” dahil nabusog na ako sa inuwi kong pang-almusal na “tapsi”.

            “Kaw ah, isnabero ka,” ang nabanggit sa akin ng nakasalubong kong kasama sa hanap-buhay ngayon. Gabi na kasi… saka nanibago yung mata ko kasi sanay akong makita siyang naka-uniform. Idagdag pa na buntis pa siya nung huli ko siyang makita mga 4-5 taon na ang nakaraan, kaya yun na yung tumatak sa isip ko haha (‘gang ngayon dapat buntis?). Kahit pa nga naka-uniform na siya, mga ilang segundo pa bago ko ma-recognize na siya na pala yun dahil iba na talaga ang itsura ni ma’am ngayon.

            At saka madalas naman akong masabihan na ‘isnabero’ porke ba minsan ay hindi ako nakasalamin, malay ko ba kung kinakawayan nila ako o papalapit na pala sila sa akin hehe.

            Nawalan bigla ng tubig… pinagkasya ko ang isang timbang tubig para maligo… parang bitin… daanin na lang sa lotion.