read at your own risk.

Naalala ko lang. Sabi ng isang kaklase ko noong kolehiyo, kung bibigyan siya ng chance to live another life ang pipiliin niya ay ang maging isang porn star! Syempre, alam naman namin na  nagbibiruan lang kami sa usapan na iyon, kaya tawanan na lang kami like ‘wtf ano yang pinagsasabi mo.’

Tapus, may isang tagpo noon na hinayaan niya kaming basahin ang isinulat niyang kwento na medyo erotic; yung parang katulad ng nababasa sa mga tabloid, mala-xerex ang genre ganun. Pinabasa niya sa namin yun para malaman niya kung mahusay na ba ang kanyang pagkakasulat (peer review ba, char). Yun ang pinagkakaabalahan namin habang naghihintay na magsimula ang klase. Di ko na matandaan kung tungkol saan ang kwento, pero hanggang ngayon ay tanda ko pa rin yung ilang words / metaphor na ginamit niya roon, tulad ng 'ice cream', ‘hindi nauubos na ice cream’ – mga double meaning. Nakasulat lang yun sa isang pilas ng papel. At ang eksena pa, habang binabasa ng isa, maku-curious yung iba, hanggang sa saglit mo pa lang na hawak yung papel eh aagawin at uusisain na ng iba, tapus tawanan! Hanggang sa wala na, simula na ng klase, may prof na.

Ano ba’ng meron sa amin noong kolehiyo? Stress ata kami sa acads noon… pero parang ‘di naman. Minsan maiisip ko na lang na dahil ba science major kami or sadyang marurumi lang kami mag-isip, or wala lang talagang mapaglagyan ang likot ng isip namin. Pero, nag-aaral naman kaming mabuti noon, pramis!

At bakit ba sa dami ng alaala noong kolehiyo ay ito pa talaga ang naalala ko ngayong araw? (29 March 2020, Linggo 1:55 ng hapon). Anyway…

Minsan, naiisip ko na bakit ‘taboo’ pag-usapan ang porn / pornography? Alam ko naman na masalimuot ang topic na ito, kaya susubukan kong talakayin ito sa ibang perspective (taray, lecture?).

Sa ibang bansa gaya ng Japan o USA, ang pornography ay isang industriya. Minsan nakapanuod ako ng interview ng isang porn star (pero sandali lang ah, lilinawin ko lang na ‘interview’ yung napanuod ko, so walang kahit na anong calisthenics na ganap doon, interview talaga). Ang interview na iyon ay hindi tungkol sa 'porn' itself; ito ay tungkol sa mga taong nasa industriya ng pornograpiya (yung ‘allowed’ or ‘permitted’ na gawin sa kanilang bansa). Nalaman ko sa interview na si porn star sa totoong buhay ay may bachelor's degree sa anthropology at may master's degree pa sa fine arts. Sa case nya kasi, isa sa dahilan kung bakit pinasok niya ang porn industry ay para masuportahan ang kanyang sarili sa pag-aaral. Kaya ngayon, iniisip ko tuloy kung ganun din kaya ang dahilan ng kaklase ko kung bakit niya nasabi yun noon, charot. At dahil nga si porn star ay may master’s degree sa arts, gumawa siya ng kanyang sariling studio / production para ma-express in a creative / artsy manner yung ginagawa niya –  hindi talaga yun porno-type ah,  parang isang kakaibang palabas lang, mala-drag ganun. Nakaka-amaze ‘di ba? or hindi rin.

Dati ay may sinusubaybayan akong blog ng isang phd student (foreigner siya, at working professional) at yung blog niya actually ay parang koleksyon ng mga hinaing o pahayag ng mga tulad niyang phd students na nakararanas ng diskriminasyon sa trabaho / unibersidad lalo na kung malalaman na sila ay mga 'sex workers' (sa blog niya ay may iba rin namang tinatalakay na issue tulad ng racism at iba pa).

Kung ilalapat sa kultura natin or kahit sa komunidad na lang kung saan ako naroon, baka hindi talaga maging very acceptable (?) ang mga ganung uri ng sitwasyon – phd student na working professional na sex worker. Yung ilan sa kanila ay nasa academe habang tinatapos ang kanilang doctoral degree, idagdag pa na hindi sila takot na ihayag ang sarili sa iba na sila ay 'sex worker'. Alam ko marami talaga ang magtataas ng kilay. But we have to take note na may mga lugar sa mundo na legal ang prostitution or ang pagiging sex worker.

Meron ding iba pang kahulugan ang pagiging sex worker; hindi lamang ito nakakulong sa gawain ng pagbibigay aliw.

Sa iba pang pananaw, may mga sex worker na ang pangunahing layunin ay makapagbigay ng ‘therapy’. May napanuod ako dati na isang docu tungkol sa isang babaeng sex worker / therapist na may isang client na lalaki. Sa mga sessions nila magpapanggap yung babae as if wife siya nung client na lalaki, kaya may mga tagpo sa sessions nila na magiging intimate sila or sweet sa isa’t isa. Ang objective ng sessions ay para turuan niya yung client na lalaki sa kung paano niya maha-handle ang sarili sa ganuong uri ng sitwasyon; mala-simulation activity (practicum level, char). Sa isang tagpo sa docu, sinabi ng lalaki na yung mga sessions nila ay makatutulong sa kanya para maging mas confident sa kanyang sarili. At wait ulit ah, ang napanuod ko ay isang 'docu' na may censorship, walang halong gymnastics.

May mga sex workers din na ang kanilang kliyente ay mga persons with disability. Ito ay para maisakatuparan ang pangangailangan nila sa intimacy / sex. Paglilinaw na hindi sila yung nakikipagtalik sa client. Isa rin itong docu, ang dami kong time manuod noong mga panahon na iyon di ba. Well, una dahil sa wala pa ako noon sa public school na maraming paper works, char! Pangalawa, di naman kasi ako mahilig manuod ng mga series ganyan, or mga telenovela kaya madalas talaga mga docu ang pinapanuod ko. At saka panahon ito noong kasagsagan ng mga docu sa Pilipinas, kaya minsan tumitingin din ako ng mga gawang docu sa ibang bansa, like ano kaya ang kaibahan ng content ng mga docu nila sa atin, ganun. Anyway.

Gaya nga ng nasabi ko, yung isa pang napanuod kong docu ay tungkol sa mga tao na ang trabaho ay pagbibigay ng ‘assistance’ sa mga pwd couples para makapag-perform din ng sexual activity. Karapatan din nila yun, at pangangailangan din nila iyon. Halimbawa, dahil sa parehas silang pwd, bedridden ganyan, may mag-a-assist sa kanila tulad ng mailapit sila sa isa't isa, mai-posisyon nang tama atbp para magawa nila ang bagay na iyon. At syempre hanggang dun lang talaga yung pinakita sa docu, may censorship din ito natural. Pero alam kong kahit ‘di na pinakita ang iba pang ganap eh understood na yun di ba. Privacy is the best policy! Sa dulo ng panunuod ko, hahanga na lang ako sa mga pwd na hindi takot na ipaalam, ipa-realize sa mga tao na tulad ng mga walang kapansanan sa buhay ay mayroon din silang mga pangangailangan.

Ayan, wala na akong maisip or maalala. Or kung meron, nsfw na, charot!

Bakit ba ganito ang hanash ko ngayon? Nanuod lang naman ako ng sports kagabi, Korea vs USA - 2012 London Olympics – Women’s Volleyball. Galing ni KYK dito, talo nga lang sila.