"... yun nga nasa itaas na raw sila."

                Ika-27 ng Abril, biyernes, ay nanuod kami nila Eldie at Neri ng The Avengers: Infinity War. Hindi ito isang movie review; gusto ko lang ibahagi na bukod sa amazing na special effects ng pelikula ay katangi-tangi rin ang ilang eksena. Ang pinakapaborito ko ay yung kay Thanos nang kukunin na niya ang soul stone; mapapasakanya lamang ang bato kapalit ng buhay ng isang taong pinakamamahal niya. Ang buong akala ni Gamora ay mabibigo si Thanos, dahil sino nga naman ang mag-aakala na may pagmamahal ang isang villain na tulad ni Thanos. Lumuha si Thanos dahil alam niyang ang kapalit ng soul stone ay ang buhay ng anak-anakan niyang si Gamora; ngunit dahil sa kagustuhan niyang makumpleto ang mga infinity stones, itinuloy pa rin ni Thanos ang paghulog kay Gamora sa bangin para maging alay kapalit ng soul stone…

                Pero bago yun, mga isang oras ko munang hinintay sila Eldie at Neri sa NBS, doon ako tumambay (wala na kasi yung Booksale) para kahit paano ay malibang (valid naman kung bakit sila nahuli, di tulad ko sadyang huli dumarating).

Isa sa mga nabasa ko ay ang Hinugot sa Tadyang ni Lualhati Bautista, ito ay tungkol sa mga kababaihan; iba’t ibang salaysay. Nabasa ko yung parte na tungkol sa kulay na naging label na para sa mga batang lalake at babae – blue para sa mga lalake at pink para sa mga babae. Nakasaad din sa libro na dati ay baligtad ang naka-assign na kulay, pink ang para sa mga batang lalake.

Hindi ko natuloy ang pagbabasa dahil may biglang sumulpot na tatlong mga batang babae (teenagers) mula sa aking likod, tapus yung isa sa kanila binasa ng malakas yung subtitle ng susunod na pahina (na babasahin ko), at kinuha naman ng isa sa gilid ko ang isa pang kopya ng libro, binasa niya ng malakas ang title tapus nagtawanan sila. Hindi ko alam kung nakornihan ba sila sa title o nakakatawa ba yun? Pero, inisip ko na lang, hindi pa kasi nila alam kung tungkol saan ang libro, kahit naman ako nung una parang na-curious pero di naman ako natawa. Kaya lumipat na lang ako sa kabilang bookshelf, kung nasaan yung mga libro ni Ambeth Ocampo (kaysa maimbyerna); nabasa ko na noon pala ay gawa rin sa jade ang mga tools ng sinaunang tao sa Pilipinas, so hindi lang basta ordinaryong bato, kundi jade.

May iba pa akong mga nabasa pero di ko na natandaan masyado, nakaantabay din kasi ako sa text nila Eldie at Neri, at yun nga nasa itaas (cinema) na raw sila.